ဦးဝင်းထိန်၏ပြောကြားချက်ကို ပြင်းထန်စွာကန့်ကွက်ပြီး လိုအပ်သောတုံ့ပြန်မှုများဆောင်ရွက်သွားမည်ဟု ကာကွယ်ရေးဦးစီးချုပ်ရုံးသတင်းထုတ်ပြန်

မေလ ၄ ရက်နေ့ နေပြည်တော် သတင်းစာရှင်းလင်းပွဲတွင် NLD ပါတီနှင့်ပတ်သက်သည့် အွန်လိုင်းပေါ်၌ ပျံ့နှံ့နေသောသတင်းများအား မဟုတ်မမှန်ကြောင်း ရှင်းလင်းပြောဆိုခဲ့ရာ အမျိုးသားဒီမိုကရေစီအဖွဲ့ချုပ်ပါတီ ဗဟိုအလုပ်အမှုဆောင် အတွင်းရေးမှူးအဖွဲ့ဝင် ဦးဝင်းထိန်၏ ပြောကြားချက်ကို ပြင်းထန်စွာကန့်ကွက်ကြောင်းနှင့် လိုအပ်သောတုံ့ပြန်မှုများ ဆောင်ရွက်သွားမည် ဖြစ်ကြောင်း တပ်မတော်ကာကွယ်ရေးဦးစီးချုပ်ရုံးက ယနေ့ သတင်းထုတ်ပြန်ခဲ့သည်။
 
သတင်းစာရှင်းလင်းပွဲ၌ မဟုတ်မမှန်သတင်းများနှင့်ပတ်သက်၍ မည်သူ့အပေါ်သံသယရှိကြောင်း ဧရာဝတီသတင်းဌာနမှမေးမြန်းရာ ဦးဝင်းထိန်က “ကြားနေရတာတွေက အများကြီး။ ကြံ့ခိုင်ရေးကပဲလုပ်သလား၊ အချို့တပ်မတော်အဖွဲ့အစည်းတွေကပဲလုပ်သလား။ ကျွန်တော်တို့ကို မလိုလားတဲ့ အိုင်တီမှာ ကျွမ်းကျင်တဲ့သူတွေကပဲလုပ်သလားမှန်းဆရခက်တယ်” ဟု ဖြေကြားခဲ့ခြင်းဖြစ်သည်။
 
ယင်းသို့ဖြေဆိုခြင်းသည် အခြေအမြစ်ခိုင်လုံခြင်းမရှိသော သံသယစိတ်အပေါ် အခြေခံ၍ တပ်မတော်အား ထည့်သွင်းပုတ်ခတ်စွပ်စွဲပြောဆိုခဲ့ခြင်းဖြစ်ကြောင်း၊ တပ်မတော်၏ ဂုဏ်သိက္ခာကိုများစွာထိခိုက်စေကြောင်း၊ သတင်းမီဒီယာနည်းဥပဒေ၊ အခန်း(၄)၊ သတင်းမီဒီယာသမားများ လိုက်နာရမည့် တာဝန်နှင့် ကျင့်ဝတ်များ၌ပါရှိသော “အများပြည်သူ၏ အကျိုးစီးပွားနှင့်စပ်ဆိုင်သည့် သတင်းရေးသားခြင်း မဟုတ်လျှင် ပုဂ္ဂိုလ်တစ်ဦး၊ အဖွဲ့အစည်းတစ်ခု၏ ဂုဏ်သိက္ခာကို တမင်ထိခိုက်စေသော အရေးအသားနှင့် လူ့အခွင့်အရေးကို ထိခိုက်စေသော အရေးအသားမျိုးဖော်ပြခြင်းမှ ရှောင်ကြဉ်ခြင်း” ကို ချိုးဖောက်စေရန်အားပေးအားမြှောက်ပြုစေကြောင်း သတင်းထုတ်ပြန်ချက်တွင်ရေးသားထားသည်။
 
ထို့အပြင် ယနေ့အချိန်သည် အမျိုးသားပြန်လည်သင့်မြတ်ရေးနှင့် အမျိုးသားရင်ကြားစေ့ရေးကို အစဉ်တစိုက် ဦးတည်ဆောင်ရွက်နေသောကာလဖြစ်ပြီး ယင်းကာလ၌ တပ်မတော်အပေါ် အခြေအမြစ်မရှိ ပုတ်ခတ်ပြောဆိုမှုအား ပြင်းထန်စွာကန့်ကွက်ကြောင်းနှင့် လိုအပ်သော တုံ့ပြန်မှုများဆောင်ရွက်သွားမည်ဖြစ်ကြောင်း သတင်းထုတ်ပြန်ခဲ့သည်။
 
ဉာဏ်အလင်း