ကုလလူ့အခွင့်အရေးကောင်စီ၏ ရခိုင်ပြည်နယ်ဆုံးဖြတ်ချက်ကို လက်မခံဟု ဒေါ်အောင်ဆန်းစုကြည်ပြော

နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် နိုင်ငံတော်အစိုးရတာဝန်ယူမှု တစ်နှစ်ပြည့်အထိမ်းအမှတ် ပြောကြားသည့် မိန့်ခွန်းထဲတွင် ရခိုင်ပြည်နယ်အရေးကိစ္စနှင့်ပတ်သက်သည့် ကုလသမဂ္ဂလူ့အခွင့်အရေးကောင်စီ၏ ဆုံးဖြတ်ချက်ကို လက်မခံနိုင်ကြောင်း ထည့်သွင်းပြောကြားသွားခဲ့သည်။
 
“လက်မခံခဲ့တာဟာ ကျွန်မတို့ ကုလသမဂ္ဂကို မလေးစားလို့လည်းမဟုတ်ဘူး။ ဒီကုလသမဂ္ဂလူ့အခွင့်အရေးကောင်စီထဲမှာပါဝင်တဲ့နိုင်ငံတွေကို ကျွန်မတို့ မိတ်ဆွေအဖြစ်နဲ့ မမြင်လို့လည်းမဟုတ်ဘူး။ ဆုံးဖြတ်ချက်ဟာ ကျွန်မတို့နိုင်ငံနဲ့ မကိုက်ညီဘူးလို့ ကျွန်မတို့ယူဆလို့ လက်မခံတာပါ။ ကျွန်မတို့နိုင်ငံနဲ့ကိုက်ညီတယ်လို့ ယူဆတဲ့အကြံဉာဏ်တွေဆိုရင် ကျွန်မတို့ဟာ ကျေးဇူးတင်စွာနဲ့ လက်ခံမှာဖြစ်ပါတယ်” ဟု ဒေါ်အောင်ဆန်းစုကြည့်က ပြောကြားခဲ့သည်။
 
နိုင်ငံနှင့်ကိုက်ညီသည့် အကြံဉာဏ်များသာဖြစ်ပါက အကောင်အထည်ဖော်နိုင်ဖို့ အတတ်နိုင်ဆုံးကြိုးစားသွားမည်ဟုလည်း ဆိုခဲ့သည်။ ထို့အပြင် ရခိုင်ပြည်နယ်နှင့်ပတ်သက်သည့် ကုလလူ့အခွင့်အရေးကောင်စီဆုံးဖြတ်ချက်အား လက်မခံခဲ့ခြင်းသည် နိုင်ငံ၏အနာဂတ်ကို ရှေ့ရှုပြီးလုပ်ခဲ့ခြင်းဖြစ်သည်ဟု ဆက်လက်ပြောကြားခဲ့သည်။
 
“ကျွန်မတို့ အခု တစ်နှစ်အတွင်း လုပ်ခဲ့တဲ့ ကိစ္စရပ်အားလုံးဟာ နိုင်ငံရဲ့ အနာဂတ်ကို ကျွန်မတို့ ရှေ့ရှုပြီးတော့ လုပ်ခဲ့ပါတယ်” ဟု ပြောခဲ့သည်။
 
လွန်ခဲ့သည့် မတ်လ ၂၄ ရက်နေ့တွင် လုံခြုံရေးကောင်စီသည် မြန်မာနိုင်ငံရခိုင်ပြည်နယ်သို့ အချက်အလက်ရှာဖွေစုံစမ်းရန် နိုင်ငံတကာအဖွဲပတစ်ဖွဲ့ကို စေလွှတ်မည်ဟု ဆုံးဖြတ်ခဲ့သည်။ ယင်းအဖွဲ့သည် ကုလသမဂ္ဂအချက်အလက်ရှာဖွေရေးမစ်ရှင် (United Nations fact-finding mission- FFM) ဖြစ်ပြီး လူ့အခွင့်အရေးချိုးဖောက်မှုများရှိနေသော မတည်ငြိမ်သည့်အရပ်ဒေသများသို့သွားရောက်ကာ အချက်အလက်များရှာဖွေစုဆောင်းပေးခြင်းနှင့် အချိန်မရွေးပေါက်ကွဲလာနိုင်သည့်အခြေအနေများကိုလည်း အချက်ပြဖော်ထုတ်ပေးခြင်း စသည့်တာဝန်များကို အဓိကထမ်းဆောင်သည်။
 
အဖွဲ့ဖွဲ့စည်းရန်အတွက် လုံခြုံရေးကောင်စီ၊ အထွေထွေညီလာခံနှင့် အထွေထွေအတွင်းရေးမှူးချုပ်တို့က တာဝန်ယူပြီး သက်ဆိုင်ရာနိုင်ငံ၏ သဘောတူညီချက်ဖြင့် ဖွဲ့စည်းတာဝန်ပေးသည်။ FFM ဖွဲ့စည်းခြင်းကို သက်ဆိုင်ရာနိုင်ငံက သဘောတူလက်ခံပြီး ပူးပေါင်းဆောင်ရွက်ရန်တိုက်တွန်းကြမည်ဖြစ်ပြီး ငြင်းပယ်မည်ဆိုပါက COI (Commissions of Inquiry) ဟုခေါ်သော စုံစမ်းစစ်ဆေးရေးကော်မရှင်ကို ထပ်မံစေလွှတ်နိုင်ရန် ဆောင်ရွက်မည့်အလားအလာများရှိနေသည်။ မြန်မာနိုင်ငံ ရခိုင်ပြည်နယ်အတွက် FFM ဖွဲ့စည်းစေလွှတ်ရေးကို ဥရောပသမဂ္ဂ (EU) က ကမကထပြုလုပ်ခဲ့ပြီး အမေရိကန်အပါအ၀င် နိုင်ငံအတော်များများ၏ ထောက်ခံမှုဖြင့် ဆုံးဖြတ်ခဲ့ခြင်းဖြစ်သည်။
 
လွန်ခဲ့သည့် နှစ် ၅၀ အတွင်း လူ့အခွင့်အရေးချိုးဖောက်သည့် ဒေသများကို FFM အဖွဲ့အစည်းပေါင်း အများအပြားကို စေလွှတ်ခဲ့သည်။
ဉာဏ်အလင်း
ယခုလထုတ် ဉာဏ်အလင်း မဂ္ဂဇင်း အတွဲ(၁) အမှတ်(၄) ကို Download ရယူရန် –
Mediafire – http://bit.ly/2mE2MPq
pCloud – http://bit.ly/2m6cB5B
Dropbox – http://bit.ly/2lqzmnz