ဇကားသ်မှန်မှန်ကန်ကန်ပေးကြစို့ 

ကဏ္ဍ – Hadith
 
ဟဇရသ်အဗူဟိုရိုင်ရဟ်သခင်ဆင့်ပြန်ပြီးတမန်တော်အမိန့်ရှိသည်မှာ အကြင်သူတစ်ဦးတစ်ယောက်ဟာ ရွှေငွေဥစ္စာပစ္စည်းများချမ်းသာပါလျက် ဇကားသ်ဆင်းရဲသားဒါနကြေးမပေးဆောင်ပါက ၎င်းရွှေငွေတို့ ကိုအပြားလိုက် အပြားလိုက် ပြုလုပ်ပြီးမီးကင်ကာဇကားသ်မပေးသောသူ၏ ခန္ဓာကိုယ်ပေါ်တွင် ကပ်မည်ဖြစ်သည်။
(မွတ်စ်လင်ကျမ်း)
 
ဇကားသ်ဆိုသည်မှာဆင်းရဲသားဒါနကြေးကိုခေါ်ပါတယ်။ ဇကားသ်ဟာအစ္စလာမ့်မဏ္ဍိုင်တွေထဲမှာတစ်ခုအပါအဝင်ဖြစ်ပါတယ်။ဆွလာသ်၊ ရိုဇာအရေးကြီးသလိုဇကားသ်လည်းအရေးကြီးပါတယ်။
 
ဇကားသ် ဆင်းရဲသားဒါနကြေးမပေးတော့ဘူးဆိုပါကကပ်ဆိုက်မှုများကြုံတွေ့ ရမယ်လို့ တမန်တော်မြတ်ဆွလ္လလ္လာဟုအလိုင်းဟိဝစလ္လမ်က ကြိုတင်သတိပေးခဲ့ပါတယ်။သာဝကကြီးအိဗ်နုအိုမရ်သခင်ဆင့်ပြန်တဲ့ ဟဒီးဆ်တော်မှာတမန်တော်မြတ်ကဇကားသ်မပေးတဲ့သူတွေကြောင့် မိုးခေါင်ရေရှားမှုတွေဖြစ်ရကြောင်း၊ သတ္တဝါတွေသာမြေပထဝီပေါ်မရှိပါကရေတစ်စက်မှ ရမည်မဟုတ်ကြောင်းအမိန့် ရှိပါတယ်။
 
မွတ်စ်လင်တို့ရဲ့ခံယူချက်အရဥစ္စာပစ္စည်းများ၏ ပိုင်ရှင်အစစ်အမှန်ဟာအလ္လာဟ်အရှင်မြတ်သခင်သာဖြစ်ပါတယ်။ခေတ္တခဏလူသားတွေကိုပေးအပ်ထားတာဖြစ်ပြီးအချိန်မရွေးပြန်ယူနိုင်စွမ်းလည်းရှိပါတယ်။ နေ့မြင်ညပျောက် ညမြင်နေ့ပျောက် ဆိုတဲ့စကားဟာဥစ္စာပစ္စည်းများရဲ့ အနှစ်ချုပ်ပဲဖြစ်ပါတယ်။
ဇကားသ် ဆင်းရဲသားဒါနကြေးမှန်မှန်ကန်ကန်ပေးဆောင်မည်ဆိုပါကသူခိုးများလျော့နည်းသွားခြင်း၊သူဆင်းရဲများတောင်းရမ်းမှုပပျောက်ခြင်းစတဲ့ ပတ်ဝန်းကျင်ကောင်းမွန်မှုတွေရရှိနိုင်ပါတယ်။
 
ဇကားသ်ပေးတဲ့အခါမှာလည်းထိုက်တန်တဲ့လူစားထိုက်တဲ့လူကိုသာပေးအပ်ရမှာဖြစ်ပြီးမထိုက်တန်တဲ့လူလက်ထဲလွယ်လွယ်ကူကူပေးအပ်လိုက်ပါကအကျင့်ပျက်ခြင်းရေသာခိုခြင်းစတဲ့ အကျင့်စရိုက်တွေတွယ်ကပ်လာနိုင်တဲ့အပြင် ဇကားသ်တာဝန်မကျေမှုအတွင်လည်းအပြစ်ထိုက်ဦးမှာဖြစ်ပါတယ်။
များသောအားဖြင့် ရမဇာန်ဥပုသ်လမှာဇကားသ်ပေးတတ်ကြတဲ့ မွတ်စ်လင်များကိုအကြံပြုလိုသည်မှာ ……
 
ဇကားသ်ရဲ့အမလ်ကိုလျှော့မတွက်ကြပါနဲ့။ အကျိုးစဝါးဗ်လည်းအင်မတန်များသလိုမှန်မှန်ကန်ကန်မဆောင်ရွက်ပါကတစ်ကျပ်တစ်ကျပ်စီတိုင်းရဲ့ပြစ်ဒဏ်ကိုခံရမှာဖြစ်ပါတယ်။ အဲဒီအတွက် ဇကားသ်အခန်းကဏ္ဍကိုတစ်ဖက်ကမ်းခတ်ကျွမ်းကျင်တဲ့နီးစပ်ရာပညာရှင်တွေထံကိုချဉ်းကပ်ပါ မေးမြန်းပါ။မိမိအရောင်းအဝယ် စီးပွားရေးတစ်ခုလုံးကိုရှေ့မှာထားပြီးအလ္လာဟ်ကိုကြောက်ပြီးဇကားသ်ကိုတွက်ချက်ပါ။တစ်ပြားတစ်ချပ်မှ မကွာအောင်သတိထားပါ။
အဲဒီနောက် ထုတ်ရမယ့်ဒါနကြေးကိုထိုက်တန်သူကိုရှာဖွေပြီးပေးအပ်ပါ။လွယ်လွယ်ကူကူဗလီအရှေ့မှာတွေ့တဲ့ လူတိုင်းကိုဇကားသ်ပေးခြင်းဟာအထမမြောက်တဲ့အပြင် သူတောင်းစားတိုးပွားအောင်လုပ်ခြင်းရဲ့နောက်ဆက်တွဲအပြစ်ဒဏ်လည်းထိုက်ပါမယ်။
ဇကားသ်ငွေဟာသူဆင်းရဲတို့ရဲ့ရပိုင်ခွင့်ဖြစ်ပါတယ်။ကျနော်တို့ပိုင်တဲ့ငွေမဟုတ်ပါဘူး။မပေးဘူးဆိုပါကဆင်းရဲသားတို့ရဲ့အခွင့်ရေးချိုးဖောက်ရာရောက်ပါတယ်။တစ်ချိန်တုန်းကဇကားသ်ပေးမယ့်သူတွေဟာယူမယ့်သူတွေကိုတကူးတကလိုက်ရှာပြီးပေးရတဲ့ခေတ်ဖြစ်ပါတယ်။အခုတော့ ယူမယ့်သူတွေသာများသထက်များလာပါတယ်။ဖောင်းပွလာတဲ့ခေတ်ပျက်ကြီးမှာကိုယ့်ဖရဇ်ွတာဝန်ကျေဖို့တစ်မြို့ဝင်တစ်မြို့ထွက် တစ်ရွာဝင်တစ်ရွာထွက် လိုက်လံရှာဖွေပြီးပေးအပ်ရမှာဖြစ်ပါတယ်။
(M.အောင်မြတ်ဦး)

ရမဇာန်အထူးထုတ် ဉာဏ်အလင်း အတွဲ(၁) အမှတ်(၇) ကို အောက်ဖော်ပြပါ ကြိုက်နှစ်သက်ရာ Link တစ်ခုကနေ Download ရယူနိုင်ပါပြီ။

Mediafire – http://bit.ly/2sfEZqD
pCloud – http://bit.ly/2sMWi38
Dropbox – http://bit.ly/2thhOKM