အစ္စလာမ်တရားတော်ကပြောသော ဝတ်စားဆင်ယင်မှု

ကဏ္ဍ – Hadith

(M.ကျော်ထွေးဝင်း)

အစ္စလာမ်တရားတော်ဟာ ခေါင်းစခြေဆုံး လူ့ဘဝတစ်ခုလုံး တည်ဆောက်ရေးနဲ့ပတ်သက်တဲ့ ကဏ္ဍတွေအားလုံးမှာ ဘယ်လိုနေထိုင်ရမလဲ၊ ဘာတွေကျင့်သုံးရမလဲ၊ ဘာတွေဆောင်ပြီး ဘာတွေရှောင်ရမလဲ ဆိုတာကို စုံစုံလင်လင်သင်ကြားပြသပေးထားပြီးသားဖြစ်ပါတယ်။ ဒီကဏ္ဍတွေထဲကမှ လူ့ဘဝအတွက် အရေးပါတဲ့ ကဏ္ဍတစ်ခုဖြစ်တဲ့ ဝတ်စားဆင်ယင်မှုကဏ္ဍမှာ အစ္စလာမ်က ဘာတွေသင်ကြားပေးထားသလဲ ဆိုတာတင်ပြပေးသွားပါမယ်။

အဝတ်အစားနဲ့ပတ်သက်ပြီး အစ္စလာမ်ဟာ လူသားအားလုံးအတွက် ဒီအဝတ်အစားတစ်ခုပဲဝတ်ရမယ်ဆိုပြီး ထူးထူးခြားခြားသတ်မှတ်ကန့်သတ်ထားခြင်းမျိုးမရှိပါဘူး။ လူတစ်ယောက် မိမိနေထိုင်ရာဒေသ၊ ရာသီဥတုအခြေအနေကိုအကြောင်းခံပြီး မိမိအဆင်ပြေသလို ဝတ်စားဆင်ယင်နိုင်ပါတယ်။ သို့သော်တရားတော်က ဝတ်စားဆင်ယင်တဲ့အခါတစ်ချို့စည်းကမ်းချက်တွေကို လိုက်နာဖို့ အမိန့်ပညတ်ထားပါတယ်။

ကုရ်အာန်ကျမ်းတော်မြတ်ထဲမှာ အဝတ်အစားနဲ့ပတ်သက်ပြီး အောက်ပါအရည်အချင်းနှစ်ခုကို တင်ပြထားပါတယ်။ (၁) လုံခြုံမှုအပြည့်ရှိရမယ်၊ (၂) လှပတင့်တယ်ရမယ်။

“အို-အာဒမ်၏ သားသမီးအပေါင်းတို့၊ ငါအရှင်မြတ်သည် အသင်တို့၏ အရှက်ကို ဖုံးအုပ်သည့် အဝတ်အစားကို၎င်း (အသင်တို့လှပအောင်ဆင်ယင်ရန်) ဝတ်စားတန်ဆာကို၎င်း၊ ဖန်ဆင်းတော်မူခဲ့လေသည်။ သို့ရာတွင် ပြစ်မှုဒုစရိုက်တို့မှ ကြဉ်ရှောင်ခြင်း၊ ဟီရိသြတ္တပ္ပတရားတည်းဟူသော ဝတ်စားတန်ဆာသည်ကား အမြင့်မြတ်ဆုံးပင်ဖြစ်ပေသည်။ ဤကား ၎င်းတို့လေ့လာမှတ်သားစဉ်းစားဆင်ခြင်နိုင်ကြရန် အလ္လာဟ်အရှင်မြတ်၏ သက်သေလက္ခဏာတရပ်ပင်တည်း” (ကြငှန်းများကဏ္ဍ – ၇း၂၆)

ထိုနည်းတူစွာ အဝတ်အစားဆင်ယင်မှုနဲ့ ပတ်သက်တဲ့ကဏ္ဍမှာ တမန်တော်မြတ်ကြီး ဆွလ္လလ္လားဟုအလိုင်းဟိဝစလ္လမ်သခင်ရဲ့ အောက်ပါမိန့်ဆိုချက်တွေကို လိုက်နာဖို့အရေးကြီးပါတယ်။

တမန်တော်မြတ်ဟာ အမျိုးသားများကို ခြေမျက်စိအောက်ဖုံးပြီးဝတ်ခြင်းကနေ ယခုလိုတားမြစ်ထားပါတယ်။ တမန်တော်မြတ်ဆွလ္လလ္လားဟုအလိုင်းဟိဝစလ္လမ်က အမိန့်ရှိတော်မူတယ်။ “အကြင်မည်သည့် အမျိုးသားတစ်ဦးတစ်ယောက်ရဲ့ လုံခြည်အပိုင်းအစဟာ ခြေမျက်စိအောက်ကို ရောက်နေမလဲ၊ အဲဒီအစိတ်အပိုင်းဟာ ဂျန္နမ်ငရဲဘုံသို့ ရောက်ရှိလိမ့်မယ်” (ဘုခါရီကျမ်း/၅၄၅၀)

ထိုနည်းတူစွာ တမန်တော်မြတ်သခင်က အမျိုးသားများကိုပိုးထည်သီးသန့်ဝတ်ဆင်ခြင်းကနေ တားမြစ်တော်မူတယ်။ တမန်တော်မြတ်ဆွလ္လလ္လားဟုအလိုင်းဟိဝစလ္လမ်အမိန့်ရှိတော်မူတယ်။ “ရွှေနဲ့ ပိုးထည်ဟာ ငါတမန်တော်ရဲ့ အွမ္မသ်ထဲက အမျိုးသမီးတွေအတွက် ဟလာလ်ဖြစ်ပြီး အမျိုးသားတွေအတွက် ဟရာမ်ဖြစ်တယ်” (ဘုခါရီကျမ်း/၅၈၃၇)

ထိုနည်းတူစွာ တမန်တော်မြတ်ကြီးဟာ ကာဖိရ်မုရ်ှရိက်တွေရဲ့ဝတ်စားဆင်ယင်ခြင်းကနေ တားမြစ်ထားတော်မူတယ်။ ဟဒီးစ်တော်မှာ လာရှိတယ်။ တမန်တော်မြတ်ကြီး ဆွလ္လလ္လားဟုအလိုင်းဟိဝစလ္လမ်သခင်ဟာ တစ်ရက်ဆွဟာဗဟ်တစ်ပါးရဲ့ဝတ်စားထားပုံကို မြင်တော်မူပြီး အခုလိုမိန့်တော်မူခဲ့တယ်။ “ဒီအဝတ်အစားတွေဟာ ကာဖိရ်ရဲ့အဝတ်အစားတွေဖြစ်တယ်။ ဒါကြောင့် အသင်မဝတ်ဆင်လေနဲ့” (မွတ်စလင်ကျမ်း/၂၀၇၇)

နောက်ထပ်ဟဒီးစ်တော်တစ်ပုဒ်မှာလာရှိတယ်။ “အကြင်မည်သူမဆို မည်သည့်မျိုးနွယ်စုကို အတုခိုးမလဲ၊ ကိယာမသ်ကမ္ဘာ့တရားခွင်နေ့မှာ ထိုသူထိုမျိုးနွယ်စုနဲ့အတူ ရှင်ပြန်ထရမယ်” (အဗူဒါဝူးဒ်ကျမ်း/၄၀၃၃)

ဒါ့အပြင် တမန်တော်မြတ်ကြီးက အဝတ်အစားဆင်ယင်တဲ့အခါ ဖြုန်းတီးခြင်း၊ စိတ်ကြီးဝင်ခြင်း၊ မာန်မာနထောင်လွှားခြင်းကနေ တားမြစ်ထားတော်မူပါတယ်။ ဟဒီးစ်တော်မှာလာရှိတယ်။ “အသင်စားချင်သော အရာစားပါ။ ဝတ်ချင်သောအရာဝတ်ပါ။ သို့သော်အသင့်အား နှစ်ခုတည်းသော ဂုနားဟ်ထဲသို့ မနစ်မွန်းစေပါလေနှင့်။ (၁) ဖြုန်းတီးခြင်း (၂) စိတ်ကြီးဝင်ခြင်း/မာန်မာနထောင်လွှားခြင်း” (ဘုခါရီကျမ်း/၁၀/၂၆၄)

တမန်တော်မြတ်သခင်ဟာ အမျိုးသားများက အမျိုးသမီးနဲ့ဆင်တူသောအဝတ်အစား၊ အမျိုးသမီးများက အမျိုးသားများနဲ့ဆင်တူသောအဝတ်အစားဝတ်ဆင်ခြင်းကို တားမြစ်ထားတော်မူပါတယ်။ ဟဒီးစ်တော်မှာ လာရှိတယ်။ “အမျိုးသမီးများနှင့် ဆင်တူအောင်နေသောအမျိုးသားများနှင့် အမျိုးသားများနှင့် ဆင်တူအောင်နေသော အမျိုးသမီးများအပေါ် တမန်တော်မြတ် ဆွလ္လလ္လားဟုအလိုင်းဟိဝစလ္လမ်က လအ်နသ်ပို့တော်မူတယ်။ တဖန်အမိန့်ရှိတော်မူတယ်။ ထိုသူများအားအသင်တို့အိမ်များမှ မောင်းထုတ်ကြလေကုန်” (ဘုခါရီကျမ်း/၅၈၈၆)

တင်ပြပါ အာယတ်တော်နှင့် ဟဒီးစ်တော်များကိုအခြေခံပြီး အဝတ်အစားနဲ့ ပတ်သက်လို့ တရားတော်က လိုက်နာကျင့်သုံးရန် ပြဋ္ဌာန်းထားတဲ့ စည်းကမ်းချက်တစ်ချို့ကို တင်ပြပေးသွားပါမယ်။

(၁) ယောက်ျားဖြစ်စေ၊ မိန်းမဖြစ်စေ တရားတော်က ဖုံးကွယ်ရန်အရေးကြီးသည်ဟု သတ်မှတ်ထားသော ခန္ဓာကိုယ်အစိတ်အပိုင်းအားလုံးကို ပြည့်ပြည့်ဝဝလုံခြုံစေသောအဝတ်အစားဖြစ်ရမည်။

(၂) မိမိအတွက်တရားတော်က ဖုံးကွယ်ရန်အရေးကြီးသည်ဟု သတ်မှတ်ထားသော ခန္ဓာကိုယ်အစိတ်အပိုင်း၊ ပုံသဏ္ဌာန်ပေါ်စေသော၊ ပါးလွှာသော၊ ကျပ်ထုပ်သော အဝတ်အစားမျိုးဝတ်ဆင်ခြင်းမှရှောင်ရမည်။

(၃) အမျိုးသားများလုံခြည်၊ ဘောင်းဘီ ဝတ်ဆင်သောအခါခြေမျက်စိဖော်ထားရမည်။

(၄) ကာဖိရ်၊ ဖာစိက်၊ ဖာဂျိရ်များ၏ အဝတ်အစားမျိုးဝတ်ဆင်ခြင်းမှ ရှောင်ရမည်။

(၅) အမျိုးသားများ အမျိုးသမီးအဝတ်အစားဝတ်ခြင်း၊ အမျိုးသမီးများ အမျိုးသားအဝတ်အစားဝတ်ခြင်းမှ ရှောင်ရမည်။

(၆) မိမိတတ်နိုင်သောအဆင့်ထက် ဈေးကြီးသောအဝတ်အစားမျိုးမှ ရှောင်ရမည်။

(၇) ချမ်းသာကြွယ်ဝသောသူများသည် သူဆင်းရဲဟုထင်ရလောက်အောင် နွမ်းပါးသောအဝတ်အစားများ မဝတ်သင့်ပေ။

(၈) ပြစားရန်၊ မာန်မာနထောင်လွှားရန် ဝတ်ဆင်သော အဝတ်အစားပုံစံမျိုးမှ ရှောင်ရမည်။

(၉) အမျိုးသားများ သီးသန့်ပိုးထည်စစ် အဝတ်အစားများဝတ်ဆင်ခြင်းမှ ရှောင်ရမည်။

(၁၀) သန့်ပြန့်သောအဝတ်အစားဝတ်ဆင်ရမည်။ အမျိုးသားများအတွက် အဖြူရောင်ဝတ်ဆင်ခြင်းသည် နှစ်လိုဖွယ်ရာအဝတ်အစားဖြစ်ပြီး အနီရဲရောင်ဝတ်ဆင်ခြင်းသည် မက္ကရူးဟ်ဖြစ်သည်။ အနီရောင်စပ်ထားသော အဝတ်အစား၊ အနီရောင်အလိုင်းများပါသော အဝတ်အစားများမှာ ခြွင်းချက်မရှိဝတ်ဆင်ခွင့်ရှိသည်။ (ဖသာဝါ ဒါရုလ်အုလူးမ် ကရာချီ)

အထက်ဖော်ပြပါ စည်းကမ်းချက်တွေနဲ့ ကိုက်ညီရင် လူတိုင်းမိမိကြိုက်နှစ်သက်ရာအဝတ်အစားကို ဝတ်ဆင်ခွင့်ရှိပါတယ်။ တစ်ဆက်ထဲ အာလင်မ်သာသနာ့ပညာရှင်အများစုဟာ ကုရ်သဟ်ဘာကြောင့်ဝတ်ဆင်သလဲဆိုတာကို ရှင်းပြပေးလိုပါတယ်။

အထက်ပါအာယတ်တော်မှာ အလ္လာဟ်အရှင်မြတ်က သက္ကဝါရဲ့အဝတ်အစားဟာ အကောင်းမွန်ဆုံးဖြစ်တယ်လို့ မိန့်ကြာထားပါတယ်။ သက္ကဝါရဲ့ဝတ်ရုံဆိုတာဘာကိုခေါ်ပါသလဲ။ သဖ်စီးရ်တွေအများကြီးထဲက အချုပ်ရှင်းပြရရင် သက္ကဝါရဲ့ဝတ်ရုံဆိုတာ အဲဒီအဝတ်အစားဝတ်နေလျက် နှလုံးသားထဲမှာ အလ္လာဟ်အရှင်မြတ်ရဲ့ အကြောက်တရား ကိန်းအောင်းနေပြီး သာသနာ့ရဲ့ အမိန့်ပညတ်ချက်တွေအပေါ် တသွေမတိမ်းလိုက်နာနိုင်စွမ်းရှိနေတဲ့ အဝတ်အစားကိုခေါ်ပါတယ်။

ဒီလိုအဝတ်အစားက ဘယ်လိုမျိုးလဲဆိုတာကို ကျနော်တို့လိုအပြစ်ပင်လယ်မှာ နစ်မွန်းနေသူတွေမသိနိုင်တော့ အနီးစပ်ဆုံးအနေနဲ့ သက္ကဝါတရားကို ဘဝတစ်ခုလုံးလက်ကိုင်ထားခဲ့တဲ့ ကျနော်တို့မြင်တွေ့ကြားဖူးခဲ့ရတဲ့ သာသနာ့ပညာရှင် သူတော်စင်ကြီးတွေရဲ့ အဝတ်အစားကိုလိုက်ကြည့်ပြီး ယခုခေတ်သာသနာ့ပညာရှင်အများစုဟာ ကုရ်သဟ်ကိုလိုက်ပြီးဝတ်ကြတာပါ။

ဒါကြောင့် သာသနာ့ပညာရှင်သူတော်စင်သူတော်မြတ်တွေကိုကြည့်ပြီး သူတို့လိုလိုက်ဝတ်တယ်ဆိုရင် အထက်က ဟဒီးစ်မှာတင်ပြထားသလို ကိယာမသ်ကမ္ဘာ့တရားခွင်နေ့မှာသူတို့နဲ့အတူ ရှင်ပြန်ထနိုင်ဖို့ မျှော်လင့်ချက်ထားလို့ရသွားမှာပါ။

ဉာဏ်အလင်းမဂ္ဂဇင်း အတွဲ(၁) အမှတ်(၉) သြဂုတ်လထုတ်ကို Download ရယူရန်

Mediafire – http://bit.ly/2w2D4r2
pCloud – http://bit.ly/2vuKWhs