ရောဂါဘယကင်းရှင်းရေး ၀ုဇူမှန်မှန်ပြုလုပ်ပေး

ကဏ္ဍ – Health
 
အစ္စလာမ်သာသနာမှာ သန့်ရှင်းစင်ကြယ်ခြင်းက အင်မတန်အဓိကကျလှပါတယ်။ အစ္စလာမ်ကပြောတဲ့ သန့်ရှင်းစင်ကြယ်ခြင်းဆိုရာမှာ ပြင်ပခန္ဓာကိုယ်စင်ကြယ်ခြင်းအပြင် အတွင်းစိတ်ဝိဉာဏ်စင်ကြယ်ခြင်းရှိဖို့အတွက်ပါ ပါဝင်ပါတယ်။ အတွင်းစိတ်ဝိဉာဏ်စင်ကြယ်ခြင်းကတော့ နှလုံးသားဟာ စေးနှဲတွန့်တိုခြင်း၊ မစ္ဆရိယစိတ်မွေးခြင်း၊ မုန်းတီးခြင်းနဲ့ သူတော်ကောင်းယောင်ဆောင်ခြင်း အစရှိတဲ့ မကောင်းတဲ့ဉာဏ်ဆိုးတွေကနေ ကင်းရှင်းသွားခြင်းကိုဆိုလိုပါတယ်။
 
မွတ်စလင်တစ်ယောက် တစ်နေ့ဆွလားသ်ငါးကြိမ်ဝတ်ပြုဖို့ရာအတွက် ၀တ်မပြုခင်တစ်ကြိမ်စီတိုင်းမှာ ကိုယ်လက်သန့်စင်ခြင်းကို မဖြစ်မနေလုပ်ရပါတယ်။
အို – မုအ်မင်သက်ဝင်ယုံကြည်သူအပေါင်းတို့၊ အသင်တို့သည် “ဆွလာတ်” ၀တ်ပြုရန်ထကြသောအခါ မိမိတို့မျက်နှာများကို၎င်း၊ လက်များကိုတံတောင်ဆစ်ပါ၎င်း၊ ဆေးကြောကြလေကုန်။ ထိုနည်းတူစွာအသင်တို့၏ ဦးခေါင်းများကို ပွတ်သပ်ကြလေကုန်။ ၎င်းပြင်အသင်တို့သည် မိမိတို့၏ ခြေများကိုလည်း ခြေမျက်စိများပါ (ဆေးကြောကြလေကုန်)။ ကုရ်အာန် – ခဲဘွယ်ဘောစဉ်ကဏ္ဍ (၅း၆)
အထက်ပါအာယတ်တော်အရ ကုရ်အာန်ထဲမှာ ၀ုဇူပြုလုပ်ဖို့ မိန့်ထားပါတယ်။ တမန်တော်မြတ် ဆွလ္လလ္လာဟုအလိုင်းဟိဝစလ္လမ်ကလည်း တစ်ခေါက်မှာ အခုလိုမိန့်ခဲ့ဖူးပါတယ်။
 
“ကေယာမသတ်ရှင်ပြထရမယ့်နေ့မှာ ငါကိုယ်တော်ရဲ့နောက်လိုက် (အွမ္မသ်သား)တွေဟာ ၀ုဇူလုပ်ထားခြင်းရဲ့ သင်္ကေတအဖြစ် မျက်နှာနဲ့ ခြေလက်တွေလင်းဝင်းတောက်ပလျက်ရှိနေမယ်” (ဘူခါရီနှင့် မွတ်စလင်ကျမ်း)
 
ဝုဇူကိုယ်လက်သန့်စင်ခြင်းဆိုတာ…
 
မွတ်စလင်အားလုံးကတော့ ၀ုဇူကိုယ်လက်သန့်စင်ခြင်းဘာလဲဆိုတာ သိပြီးဖြစ်ပါလိမ့်မယ်။ သတ်မှတ်ထားတဲ့ ခန္ဓာကိုယ်အစိတ်အပိုင်းတွေကို ရေနဲ့သန့်စင်ဆေးကြောခြင်းပါ။ ဆွလားသ်ဝတ်မပြုခင်တိုင်းမှာ ၀ုဇူလုပ်ကိုလုပ်ရပါတယ်။ အထက်မှာဆိုခဲ့တဲ့ ကုရ်အာန်အာယတ်တော်အရ ၀ုဇူလုပ်ရာမှာ အောက်ပါအစိတ်အပိုင်းတွေပါဝင်ပါတယ်။
 
(၁) လက်များကို တံတောင်ဆစ်အထိဆေးကြောခြင်း
(၂) မျက်နှာကိုဆေးကြောခြင်း (နှဖူးဆံစမှမေးအောက်ထိ၊ တစ်ဖက်နားရင်းမှ တစ်ဖက်နားရင်းထိ)
(၃) ဦးခေါင်းကို ရေဖြင့်ပွတ်သပ်ခြင်း (ဦးခေါင်း၏ သုံးပုံတစ်ပုံ)
(၄) ခြေများကို ခြေမျက်စိများအပါအ၀င် ဆေးကြောခြင်း
အဲဒီအစိတ်အပိုင်းတွေအပြင် တမန်တော်မြတ် ဆွလ္လလ္လာဟုအလိုင်းဟိဝစလ္လမ်က လက်ကိုလက်ကောက်ဝတ်ထိဆေးကြောခြင်း၊ ပါးလုပ်ကျင်းခြင်း၊ နှာနုအထိရောက်အောင် နှာခေါင်းအတွင်းရေထည့်ဆေးကြောခြင်း အစရှိတာတွေကိုလည်း လုပ်ခဲ့ပါတယ်။ မွတ်စလင်တိုင်းဟာ အဲဒီထပ်ဆောင်းဆေးကြောခြင်းတွေကို တမန်တော်မြတ်လုပ်ခဲ့တဲ့ ကျင့်စင်အတိုင်း စွန္နတ်တော်များအဖြစ် အကောင်အထည်ဖော်ပြီး လိုက်လုပ်ကြပါတယ်။
 
အလုပ်ပင်ပင်ပန်းပန်းလုပ်ပြီးခြင်း သို့မဟုတ် ခရီးသွာရင်းတန်းလန်းမှာ ဆွလားသ်ဝတ်မပြုခင်အရင် ၀ုဇူကိုယ်လက်သန့်စင်ခြင်းအားဖြင့် စိတ်ဓာတ်တက်ကြွခြင်းကိုဖြစ်စေနိုင်ပါတယ်။ ဆွလားသ်ကိုလည်း ပိုပြီးအသက်ပါအောင်ဖတ်နိုင်ဖို့၊ အာရုံပိုစိုက်နိုင်ဖို့ အထောက်အကူဖြစ်စေပါတယ်။ ၀ုဇူလုပ်ခြင်းဟာ ပြင်ပ ခန္ဓာကိုယ်အစိတ်အပိုင်းသန့်ရှင်းစင်ကြယ်စေခြင်းသာမကဘဲ မွတ်စလင်တွေရဲ့ စိတ်ဓာတ်ရေးရာနဲ့ ၀ိဉာဏ်ပိုင်းဆိုင်ရာအပေါ် ကြီးမားတဲ့သက်ရောက်မှုတွေရှိပါတယ်။
 
ဝုဇူရှိနေတဲ့ မွတ်စလင်တစ်ယောက်ဟာ စိတ်ဓာတ်တက်ကြွနေသလို တစ်ချိန်လုံးသတိဝီရိယနဲ့ နိုးနိုးကြားကြားရှိနေမှာပါ။ တမန်တော်မြတ်ဆွလ္လလ္လာဟုအလိုင်းဟိဝစလ္လမ်က “ကောင်းမွန်စွာဝုဇူပြုခြင်းအားဖြင့် လက်သည်းအောက်မှာခိုအောင်းနေတဲ့ အပြစ်ဂုနာဟ်တွေအပါဝင် တစ်ကိုယ်လုံးက အပြစ်ဂုနာဟ်တွေက ခန္ဓာကိုယ်ကနေ စွန့်ခွာသွားတယ်” လို့ မိန့်တော်မူခဲ့ပါတယ်။ (မွတ်စလင်ကျမ်း)
ရေကြည်အေးနဲ့ ၀ုဇူပြုခြင်းဖြင့် ခန္ဓာကိုယ်အတွင်းအပြောင်းအလဲတချို့ဖြစ်ပါတယ်။ လူ့ခန္ဓာကိုယ်ကို ရေပမာဏမြောက်မြားစွာနဲ့ဖွဲ့စည်းထားပါတယ်။ ခန္ဓာကိုယ်အလေးချိန်ရဲ့ ပျဉ်းမျှ၆၀ရာခိုင်နှုန်းကို ရေနဲ့ဖွဲ့စည်းထားပါတယ်။ ရေဟာ ပူသော သို့မဟုတ် အေးသောပတ်ဝန်းကျင်ကိုလိုက်ပြီး ခန္ဓာကိုယ်ရဲ့အပူချိန်ကို ထိန်းညှိပေးပါတယ်။ ခန္ဓာကိုယ်ကို အပူအအေးမျှတစေဖို့အတွက် ၀ုဇူလုပ်ခြင်းက အရေးပါတဲ့လုပ်ဆောင်မှုတွေ ပြုလုပ်ပေးပါတယ်။
 
အခု ၀ုဇူလုပ်ခြင်းကြောင့်ရရှိမယ့် ကျန်းမာရေးဆိုင်ရာအကျိုးကျေးဇူးတွေကိုတင်ပြပါမယ်။
 
(၁) ၀ုဇူလုပ်ခြင်းဟာ အရေးကြီးတဲ့ခန္ဓာကိုယ်အစိတ်အပိုင်းတွေကနေ အညစ်အကြေးနဲ့ဖုန်မှုန့်တွေကို ဖယ်ရှားပေးရုံသာမက အရေပြားကိုလည်း နူးညံ့စေပြီး လန်းဆန်းစေပါတယ်။
(၂) နှာနုအထိရေကိုရှုသွင်းခြင်းအားဖြင့် နှာခေါင်းပေါက်အတွင်းမှာ ခိုအောင်းတဲ့ ရောဂါပိုးမွှားတွေနဲ့ ဖုန်မှုန့်တွေကို ကာကွယ်တားဆီးပြီးသားဖြစ်စေပါတယ်။
(၃) မျက်နှာဆေးခြင်းကြောင့် မျက်နှာအရေပြားအပြင်ဖက်ဆုံးအလွှာကိုကာကွယ်ပေးပါတယ်။ ဒါ့အပြင် ပင်ပန်းနွမ်းနယ်ခြင်းကိုလည်း သက်သာပျောက်ကင်းစေနိုင်ပါတယ်။ ၀ုဇူမှန်မှန်ပြုလုပ်ခြင်းကြောင့် အသက်အရွယ်ကြီးရင့်လာချိန်အထိ မျက်နှာရဲ့လှပမှုနဲ့ လန်းဆန်းမှုကို ထိန်းသိမ်းပေးပြီးသားဖြစ်စေမှာပါ။
(၄) ပါးလုပ်ကျင်းခြင်းကြောင့် ပါးစပ်ထဲက စားကြွင်းစားကျန်တွေကို ဖယ်ရှားပေးပြီးသားဖြစ်မှာပါ။ ဒါကြောင့် သွားပြဿနာနဲ့ ခံတွင်းနံ့မကောင်းခြင်းကိုလည်း တားဆီးပေးပါလိမ့်မယ်။
(၅) နားရွက်ကိုဆေးခြင်းအားဖြင့် နားပိုးဝင်ခြင်းကိုဖြစ်စေနိုင်တဲ့ နားဖာချေးအပိုတွေကို ဖယ်ရှားပေးမှာပါ။ နားရွက်အနောက်ဖက်ကို သန့်ရှင်းပေးခြင်းကြောင့်လည်း နားစောင့်ရိုးနာ (mastoiditis) ဖြစ်စေတဲ့ ပိုးမွှားတွေကို ကာကွယ်တားဆီးပေးမှာပါ။
(၆) ၀ုဇူပြုလုပ်ခြင်းဟာ အရေပြားကင်ဆာကိုလည်း ကာကွယ်တားဆီးပေးနိုင်ပါသေးတယ်။ ဘာကြောင့်လဲဆိုတော့ ၀ူဇုလုပ်တဲ့အခါ ရေဆေးရတဲ့ခန္ဓာကိုယ်အစိတ်အပိုင်းတွေက အညစ်အကြေးတွေနဲ့ ထိတွေ့မှုအများဆုံး အစိတ်အပိုင်းတွေပါ။ အဲဒီအညစ်အကြေးတွေထဲမှာ ခန္ဓာကိုယ်အတွင်းကထွက်တဲ့ ချွေးတွေအပြင် အပြင်ပတ်ဝန်းကျင်ကြောင့်ဖြစ်တဲ့ ဖုန်မှုန့်နဲ့ရောဂါပိုးမွှားတွေလည်းပါဝင်ပါတယ်။ ၀ုဇူလုပ်ခြင်းက အဲဒါတွေကိုဖယ်ရှားပေးမှာပါ။
(၇) ရေဆေးခြင်းဟာ အရေပြားနဲ့နီးကပ်စွာရှိနေတဲ့ သွေးကြောအဆုံးသတ်လေးတွေ၊ အာရုံကြောတွေနဲ့ ဂလင်း(အကျိတ်)တွေကို သန်စွမ်းစေခြင်းကြောင့် သူတို့ရဲ့လုပ်ငန်းဆောင်တာတွေကို အကောင်းဆုံးလုပ်ဆောင်နိုင်မှာပါ။
(၈) ၀ုဇူလုပ်ရင် ခြေချောင်းလေးတွေအကြားထိ (ခိလာလ်လုပ်) ရေဆေးရတာကြောင့် ခြေထောက်ကို ရောဂါတွေကနေ ကာကွယ်ပေးပါတယ်။ တစ်ချိန်လုံး ရှုးဖိနပ်၊ ဝေါလ်ကင်းရှုး စီးနေရသူအတွက်လည်း သဲဝဲစားခြင်း (Athlete’s foot) ကနေ ကာကွယ်ပေးပါတယ်။
 
ဆွလားသ်ဝတ်မပြုခင်၊ အိပ်ယာမ၀င်ခင်၊ ကုရ်အာန်မကိုင်ခင်၊ ဗလီထဲမ၀င်ခင်၊ အာဇန်ဝတ်တက်ဖိတ်ခေါ်ခြင်းမပြုခင်၊ ခွသ်ဗာဟ်မဆိုခင် အစရှိတဲ့အချိန်တွေအပြင် သုဿာန်ကအပြင်၊ အသုဘကိုကိုင်တွယ်ပြီး သို့မဟုတ် ထမ်းပိုးပြီးအချိန်တွေမှာလည်း ၀ုဇူပြုလုပ်ဖို့ ညွှန်ကြားထားပါတယ်။ ကုရ်အာန်ထဲက အလ္လာဟ်အရှင်မြတ်ရဲ့ အမိန့်ညွှန်ကြားချက်နဲ့ အလ္လာဟ်ရစူးလ်တမန်တော်ရဲ့ စွန္နသ်တော်တွေဟာ လူသားတွေအတွက် အမြဲတမ်းအကျိုးရှိနေမှာပါ။ ဒီစာထဲကအတိုင်း ကျနော်တို့သိပြီးအကျိုးကျေးဇူးတွေ အများအပြားရှိသလို မသိသေးတဲ့အကျိုးကျေးဇူးတွေအမြောက်အမြားရှိမယ်ဆိုတာကိုလည်း သံသယဖြစ်ဖို့မလိုကြောင်းပါ။
(စတီဗင်)
ယခုလထုတ် ဉာဏ်အလင်း မဂ္ဂဇင်း အတွဲ(၁) အမှတ်(၄) ကို Download ရယူရန် –
Mediafire – http://bit.ly/2mE2MPq
pCloud – http://bit.ly/2m6cB5B
Dropbox – http://bit.ly/2lqzmnz